A ju pëlqen të shijoni për sot byreçka me presh?
Tani të kuptohemi, unë nuk di të bëj petë byreku kështu që sa herë të shihni byrek ke unë, është me peta të blera. Për këto përdora peta nga ato që janë të palosura në formë katrore dhe që shkruajnë petë të pjekura. Këto tip petash unë i përdor edhe për byreçkat meksikane, apo si i njohim të gjithë, spring rolls.
Byreçkat janë një opsion shumë I mirë edhe për fëmijët, sepse janë shumë praktike. Propozimi im sot është me presh meqë kemi hyrë dhe në sezonin e tij.
Megjithatë, mbushjet e byreçkave janë të pafundme. Mund ti bëni me kos e vezë, me gjizë e majdanoz, fasule, mish të grirë, etj…
Ajo që kam zbuluar është që kur përdorni peta të gatshme, duhet ti njomni shumë mirë para se ti palosni. Kështu, unë mbaj afër gjithmonë një gotë e ujë dhe një furçë për ti njomur mirë.
Mos kini frikë, se nuk tej qullen, Në pjekje kanë tendencë të thahen pak, kështu nëse I njomni mirë, do dalin perfekt.
Nuk e di ju, po mua më pëlqen që byreçkat ti shoqëroj edhe me supë. Këto psh, i kam shoqëruar me supë kungulli.
Do thoni ju, po supën e kungullit si e ke bërë? Ja, shumë shpejt do ta publikoj si recetë që të mund ta lexoni vetë. Edhe kosi është një alternativë klasike e shoqërimit të byreçkave.
Tani boll me shkrime, po ju lë të lexoni recetën për byreçka me presh më poshtë.
Byreçka me presh
Notes
Do ju nevojitet dhe 1 tas i madh i mbushur me ujë.
Përbërësit
- 🔹️ 2 presh të prerë në rrota
- 🔹️ 2 l gjelle vaj ulliri
- 🔹️ 100g djathë i thërmuar
- 🔹️ 1 pako peta të pjekura
- 🔹️ pak vaj ulliri për lyerje
Instructions
- Do ju nevojitet dhe 1 tas i madh i mbushur me ujë.
- Ndezim furrën në 250°C.
- Në një tigan skuqim në pak vaj ulliri preshin të cilin e kriposim sipas dëshirës. Sapo preshi të jetë zbutur e fikim zjarrin.
- Marrim një petë dhe e palosim në tresh për së gjati (do përftojmë një shirit me trashësi rreth 4-5gisht) dhe të gjatë.
- E zhysim petën tërësisht nën ujë që të zbutet mirë.
- Marrim 1 lugë gjelle nga mbushja dhe e shtrojmë përgjatë petës.
- Hedhim pak djathë të bardhë të thërmuar dhe palosim petën në formë trekëndëshi ose role për ata që sia japin dot formën trekëndore.
- Vazhdojmë me petët e tjera deri sa të mbatojë mbushja
- I pjekim byrekët për 30 minuta ose deri sa të marrin ngjyrë lajthi.
- PS: palosja në formë trekëndëshi bëhet duke mbajtur një kulm të petës pa lëvizur dhe tjetrin e palosim në krah të kundërt. Pastaj, mbajmë pa lëvizur kulmin që palosëm dhe palosim këndin tjetër e kështu me rradhe deri sa të jetë rrotulluar e gjithë peta.
Leave a Reply