Kjo është pa frikë torta Red Velvet më e mira që keni provuar ndonjëherë.
Për Krishtlindje e vit të ri, të gjithë gatuajnë bakllava, ndërsa unë, vendosa të bëj një tortë Red velvet.
Kam tentuar shumë variacione recetash, po pa frikë them se kam gjetur kombinimin ideal.
Me masat që po ju shkruaj këtu mund të bëni rreth 24 cupcake ose një tortë katrore me përmasa 20cm x20cm, zgjidhni e gatuani sipas dëshirës tuaj.
Pse them se kjo është Torta Red velvet më e mira që keni provuar? Sepse shija e kekut është kaq delikate dhe kombinimi me kremin e djathit janë lezeti I kësaj ëmbëlsire.
Edhe pse unë zgjodha të sjell variantin e tortës, të jini të sigurt që edhe version cupcake del yll.
Në blogun tim mund të gjeni plot receta të tjera cupcake-ësh si psh këtu, këtu apo këtu.
Ju këshilloj të ruani recetën e bërjes së kremit Philadelphia pasi ky krem shkon shumë edhe me ëmbëlsira të tjera. Si për shembull me kekun me banane, apo për role me kungull, ose cinnamon rolls etj.
Torta Red velvet më e mira që keni provuar
Përbërësit
- !Për brumin:
- 🔹️ 4 vezë;
- 🔹️ 125g sheqer kaf;
- 🔹️ 125g sheqer të bardhë;
- 🔹️ 240ml qumësht me 3.5% yndyrë +1 lugë gjelle uthull molle;
- 🔹️ 150ml vaj luledielli;
- 🔹️ 1 lugë çaji ngjyrues të kuq plus 1 lugë çaji uthull molle;
- 🔹️ 30g kakao;
- 🔹️ 240g miell;
- 🔹️ 1 lugë çaji (tsp) sodë;
- 🔹️ 1 ½ lugë çaji (tsp) pluhur pjekës
- !Për kremin e djathit:
- 🔹️ 500g Philadelphia;
- 🔹️ 250g gjalpë në temperaturë ambienti;
- 🔹️ 250g sheqer pluhur;
- 🔹️ vanilje
Instructions
- Ndizni furrën në 180◦C
- Bashkoni qumështin me uthullën e mollës dhe lerini mënjanë.
- Gjithashtu bashkoni ngjyruesin dhe uthullën
- Në një tas tjetër bashkoni miellin, kakaon, sodën dhe pluhurin pjekës e trazojini me pirun
- Në një tas të madh qelqi rrihni vezët me dy llojet e sheqernave sa të bëhen shkumë, rreth 2 minuta
- Shtoni qumështin me uthull, vajin e lulediellit dhe rrihini me mikser për disa sekonda
- Shtoni ngjyruesin dhe trazojeni masën sa të bashkohet mire
- Bashkoni të thatat me masën e lëngshme dhe rrihini aq sa masa të bëhet homogjene por pa e trazuar më shumë sesa duhet
- Hidheni brumin në një tavë me përmasa 20cm x 20cm të cilën e keni lyer më parë me pak gjalpë e miell që mos ngjisë keku.
- Pjekim kekun për 30 minuta ose deri sa maja e thikës të ngulur në mes, të dalë e pastër. Sipas dëshirës mund ta ndani brumin edhe midis 24 formave të cupcakes të veshura me letrat përkatëse
- Ndërkohë që keku piqet, përgatisim kremin e djathit. Në enën e një mikseri rrahim disa minuta gjalpin e butë.
- Shtojmë kremin e djathit dhe vaniljen dhe I rrahim per 30 sekonda, jo më shumë pasi kremi I djathit ka tendencën të bëhet I ujshëm nëse e rrahim më shumë sesa duhet.
- Shtojmë sheqerin pluhur dhe e rrahim në shpejtësi minimale, duke e rritur gradualisht shpejtësinë.
- Pasi keku të jetë ftohur mirë, e presim horizontalisht në 3 shtresa të njëjta. Lyejmë secilën shtresë me krem djathi.
- Për ta ndarë kremin në mënyrë të barabartë unë e ndaj paraprakisht në tresh, kështu secila fetë do ketë të njëjtën sasi kremi
- Kjo tortë krijon varësi, ndaj këshillohet ta konsumoni me kujdes ☺
