“Kete shkrim e njeh mire besoj”. Ky ishte mesazhi që motra ime më la kur më postoi foton e fletores me shkrimin e mamit. Po, kjo është pispilia e mamit tim, Dritës, e cila sot na sheh nga lart.
Në fakt mbaj mend nga fëmijëria që mami herë i thoshte pispili e herë shapkat. Nuk e mbaj mend fort mirë kush ishte ndryshimi, se më duket se kishte një gjë ndryshe, por nuk më kujtohet.
Në fakt, pispilia e mamit ishte pjata e preferuar e motrës sime. Unë nuk mbaj mend ta kem pas shumë qejf para se të largohesha nga shtëpia. Ama, kur largohesh nga shtëpia e jeton më vete, të merr malli për të tilla gatime. Unë e kam bërë disa herë, por sipas stilit tim dhe sipas udhëzimeve me telefon shkurt nga mami. Mua më mjaftonte të ma kujtonte në telefon, dhe pastaj e ftilloja vetë recetën. Mirëpo motra… ajo u tregua e zgjuar dhe ia mori me shënime.
E ja ku jam sot, po postoj këtë pjesëz nga mami im. Sa herë e lexoj shkrimin e saj, më kthehet në memorie zëri i saj, e qeshura, komentet kur i duhej të shkruante diçka. Sot, më duken kaq të largëta si kujtime. Nëse do ta dija më parë që demenca do ta rrëmbente para kohe, do isha munduar ti merrja më shumë kujtime të tilla 😢
Pispilia e mamit tim
Përbërësit
- 🔸2 filxhanë kafeje me vaj
- 🔸2 filxhanë kafeje me qumësht
- 🔸 presh i prerë sa më imët (rreth 300g)
- 🔸150g djathë i bardhë
- 🔸1 vezë
- 🔸3 tufa kopër & majdanoz sipas dëshirës
- 🔸miell misri, rreth 300g
- 🔸 pak sodë buke
Instructions
- Ngrohim furrën në 200° C.
- Në një tepsi ose tas të thellë hedhim vajin, qumështin, vezën, preshin, kopron dhe majdanozin dhe djathin e bardhë.
- I trazojmë mirë dhe shtojmë sodën dhe miellin e misrit avash avash deri sa masa të lidhet.
- Lyejmë një tavë me pak vaj. Unë e kisha tavën të madhe dhe ndaj pispilia më doli e hollë, por ju mund të përdorni një tepsi më të vogël nëse e dëshironi më të trashë.
- E shtrojmë masën në tepsi dhe e shtypim me duar deri sa te marrë një trashësi uniforme.
- Shtojmë pak djathë të bardhë sipër dhe e pjekim për gati 30 minuta ose deri sa të marrë pak ngjyrë.
Leave a Reply