Në blog e kam një recetë për Pulë me petë të pjekura në saç, por sot zgjodha ta sjell me video.
Nga zonat e Korçës, ne gatuajmë shpesh pulën me petë. Në fakt sekreti është te bërja vetë e petëve dhe pjekja e tyre mbi sobë, por me pianurat e sotme, vështirë se mund ti pjekim. Kështu unë kam zbuluar këto petat e pjekura në saç që i gjeni në ngrirje nëpër supermarkete që janë afër atyre të bëra vetë.
Gjithsesi, nje menyrë se si ti piqni petët jua kam treguar në këtë postim.
Unë kam marrë pulë fushe tek Driza Company 400lek/kg tek dyqani i tyre te pazari i ri. Zgjodha këtë lloj pasi ka mish të fortë dhe zierja e më pas pjekja nuk do ma shkalafitnin mishin 😅. Plus nxjerr super lëng.
Nga kjo recetë, lëngun e ruajmë dhe e përdorim më vonë për supë, pilaf, gjellë etj.
Personalisht ose e ngrij, ose e bëj supë të nesërmen. Kjo më tepër për të “larë” ndërgjegjjen që një ditë më parë hëngra brumë.
Si do që të jetë, mbani gjithmonë parasysh që në kuzhinë nuk hidhet asgjë poshtë.
Por tani, mjaft me fjalë e të kalojmë te receta jonë Pulë me petë të pjekura.
Pulë me petë
Përbërësit
- 🔹️ 1 pulë fushe @drizacompany
- 🔹️ 1 pako peta të pjekura në saç
- 🔹️ kripë
- 🔹️ gjalpë i shkrirë
- 🔹️ hudhra të shtypura
Instructions
- Ziejmë pulën në ujë të bollshëm me pak kripë për gati 30 minuta. Kullojmë pulën dhe e lëmë mënjanë.
- Shkrijmë gjalpin dhe i hedhim hudhrat brenda.
- Me një furçë e lyejmë pukën dhe e pjekum për 30 minuta në 280° C ( për efekt videoje e kam lënë tavën me peta, por ju këshilloj ta gatuani para petave).
- Pasi pula është pjekur, e vendosim në mes të tavës ku kemi shtruar një petë të paprerë.
- Copëtojmë petat si në video dhe i spërkasim me gjalpin me hudhra dhe i hedhim 2 garuzhde lëng pule rreth e qark.
- Copëtojmë dhe petat e tjera dhe i spërkasim me gjalpë e më pas me lëng.
- E pjekim tavën për 15 minuta aq sa të ngrohen petat me lëngun pasi vetë petët janë të pjekura.
- Ju bëftë mirë.
Leave a Reply