Mund t’ju duket si ëmbëlsirë pastiçerie, por ju siguroj që përgatitet shumë lehtë. Ju duhet vetëm të keni përgatitur më parë salcën e karamelit të kripur që e gjeni këtu.
Për bazën e tortës:
• 125g gjalpë më temperaturë ambjenti
• 2 kokrra vezë
• 75g sheqer i bardhë
• 25g sheqer kaf i imët
• 1 lugë gjelle qumësht
• 125g miell +1/2 tsp kripë
• 1 1/2 tsp pluhur pjekës
• Vanilje
Për kremin:
• 200g maskarpone
• 250ml panna me bazë qumështi
• 100g sheqer pluhur
• Vanilje
• 3 lugë gjelle salcë Karamel i kripur
• 2 l gjelle kakao e hidhur + pak qumësht sipas nevojës
Ndizni furrën në 180°C. Vishni një tavë me diametër 20cm me letër pjekje dhe lyejeni me gjalpë. Në një mikser rrihni gjalpin e butë me 2 sheqernat deri sa të bëhet ngjyrë bezhë e hapur.
Shtoni vezët një e nga një po sigurohuni që të jenë bashkuar mirë me gjalpin para se të shtoni pasardhësen. Më pas në shpejtësi të ulët të mikserit shtoni gjysmën e sasisë së miellit që e keni bashkuar me pluhurin pjekës dhe kripën. Shtoni 1 lugë qumësht dhe në fund miellin e mbetur. Kalojeni brumin në tavë. Nivelojeni mirë dhe piqeni për gati 40 min sa të jetë kulluar mirë. Hiqeni nga furra, lereni ende në formë edhe për 10 min pastaj hiqeni dhe lëreni të ftohet.
Për kremin me karamel:
Rrihni kremin e qumështit me maskarponen dhe sheqerin pluhur sa masa të lidhet mirë. Ndajeni midis 2 tasave. Tek njëri shtoni vanilje dhe 1 luge gjelle karamel (tjetrën ruajeni për dekor). Trazojeni mirë sa të bashkohen shijet.
Për kremin me kakao:
Shtoni tek baza kakaon dhe disa pika qumësht. Rriheni sa të bashkohen mirë. Siteni kakaon para se ta shtoni në krem që mos të keni kokrriza. Shtoni qumësht nëse kremi trashet shumë.
Për të përfunduar gjysëm tortën:
Sistemoni kekun në një pjatë të sheshtë. Anash kekut dekoroni me krem kakao dhe në mes me krem karamel. Zbukuroni me salcën e mbetur të karamelit.
Leave a Reply