Planifikimi I gatimeve gjatë pushimeve verore? Kjo pyetje më vjen gjithmonë në mendje sa herë planifikojmë pushimet verore. U bë shumë vite që unë dhe familja ime preferojmë t’i kalojmë pushimet duke prenotuar apartament. Është më komode për mendimin tim sesa hoteli dhe kjo duke iu referuar gatimit të shëndetshëm për familjen. Sigurisht duke pushuar në hotel është e lehtë pasi nuk ke nevojë të gatuash apo preokupohesh çfarë do i gatuash familjes gjatë këtyre ditëve, megjithatë pas 2-3 ditësh lodhesh duke ngrënë jashtë. Të paktën kjo na ka ndodhur ne, e mbi të gjitha le ta pranojmë, mua thjesht më pëlqen të gatuaj ☺.
Megjithatë, ashtu si unë ka plot familje që preferojnë të gatuajnë në shtëpi, e jo vetëm për t’u ushqyer mirë, por edhe për të kontrolluar shpenzimet.
Në postimin e sotëm dua t’ju listoj disa ide që mund t’i përgatisni një natë më parë dhe ta shijoni plazhin në maksimum pa kokëçarje.
Në pjesën më të madhe, gatimet që kam planifikuar do gatuhen me tenxheren elektrike që kam blerë së fundmi dhe që jam shumë e kënaqur me këtë investim, por ju mund të përdorni edhe një tenxhere të thjeshtë apo me presion.
Përsa i përket recetave, do t’ju duhet të më ndiqni pasi do mundohem t’i postoj sa më parë ☺
Unë dhe familja ime ju urojmë pushime të gëzuara dhe të shëndetshme!
LISTA E DREKAVE
Së bashku me listën po ju shtoj edhe përbërësit në mënyrë që të llogarisni edhe pazaret tuaja.
- Thjerrëza (qepë, karrotë, selino, ujë, rigon, uthull molle, kripë)
- Speca të mbushura (speca, qepë,mish të grirë, oriz, nenexhik, piper të zi, piper të kuq, kripë)
- Supë me pulë, tortelini dhe djathë (Tortelini, fileto pule, djathë çedar, lëng mishi, karrota, krem qumështi, spinaq baby. Gjalpë, miell, kripë, hudhër)
- Lazanja me kimë (djathë parmigiano, lasanja, ragu Barilla –pra e gatshme,miell, qumësht, gjalpë, arrë moskat)
- Sallatë meksikane (sallatë jeshile, oriz basmati i gatuar me pak piper të kuq, fasule borlotti në kanaçe, djathë të grirë çedar, krem të athët apo schmand,chips tortilla, vaj ulliri, kripë)
- Sallatë me ton e makarona (makarona brryl, ton në kanaçe, majonezë, kopër, vaj ulliri, spec i kuq i ëmbël)
- Qofte me kungulleshka dhe supë me perime (kungulleshka, vezë, bukë të thërrmuar, kripë, nenexhik, djathë të bardhë, dhe për supën- lëng mishi, një qese me perimë të ngrira për minestrone, unë përdor Findus)
- Supë me koçkulla (1 pako koçkulla të thata, 3 fije pançetë, selino, karrotë, qepë, lëng mishi, kripë e piper)
- Jufka me pulë (jufka, gjalpë, lëng pule, 1 pulë)
- Supë enchilada (recetën dhe përbërësit e gjeni këtu)
Supë enchilada me mish pule
Notes
Mund ta përgatisni salcën enchilada para se të niseni me pushime dhe ta merrni me vete në kavanoz qelqi.
Përbërësit
- 1 gjysëm fileto pule
- ½ kanaçe misër kokërr (e kulluar nga uji)
- 1 kanaçe fasule të kuqe (e kulluar nga uji)
- 2 domate mesatare të pjekura në prush (të prera)
- 2 speca jeshilë të pjekur në prush (të prera)
- 2 kupa salcë Enchilada* (receta si vijon)
- 2 kupa lëng mish pule
- 2 lugë çaji kumin i bluar
- 1 tufë majdanoz
- 4 lugë gjelle krem të athët (për servirje)
- 1 kupë patatina naços me djathë (për servirje)
- *Salca Enchilada:
- 1 lugë gjelle vaj ulliri
- 2 lugë gjelle miell
- 3 lugë gjelle pluhur Chili (në mungesë përdorni paprika por do ia ndryshojë shijen tërësisht)
- 1 lugë çaji kumin i bluar
- 1 lugë çaji pluhur hudhre
- 1 lugë çaji rigon
- 1 lugë çaji kripë
- 2 kupa ujë ose lëng mishi ose lëng perimesh
Instructions
- Filloni duke përgatitur salcën enchilada. Ngrohni vajin e ullirit dhe shtoni miellin. Trazojeni një ose dy herë dhe shtoni erëzat. Skuqini sa të lëshojnë aromën e tyre, pak a shumë rreth 1 minutë duke i trazuar vazhdimisht. Shtoni lëngun e mishit (ose ujin) dhe lereni të ziejë sa të trashet, rreth 10 minuta në zjarr të ulët. Pjesën që nuk do përdorni nga salca ruajeni në frigorifer pasi do na duhet për ditë tjetër
- Për supën, nëse keni tenxhere elektrike atëhere ju këshilloj fort ta përdorni
- Nëse do përdorni tenxhere elektrike , vendosni fileton e pulës, 1 kupë ujë (ose lëng mishi), domatet dhe specat e prerë, misrin, fasulet dhe 2 kupat e salcës enchilada. Trazojeni, mbyllni kapakun dhe ndizeni në opsionin P01 për gatimin me mish në presion (20 minuta). Pas përfundimit (dhe t'i ketë dalë presioni), përdorni dy pirunj për ta bërë mishin fije-fije. Trazojeni dhe gatuajeni pak në opsionin kaurdisje ose P05.
- Nëse do e bëni në tenxhere, zieni mirë fileton e pulës sa të bëhet fije-fije. Pastaj kalojeni sërisht në tenxhere, hidhni 2 kupa nga lëngu i zierjes dhe shtoni me rradhë gjithë përbërësit përveç majdanozit, salcës së athët dhe patatinave naços . Rregullojeni me kripë nëse e shihni të nevojshme dhe lereni të ziejë ngadalë për gati 15 minuta
- Për ta servirur, ndajeni në katër pjata servirjeje dhe mbi secilën prej tyre shtoni nga një lugë gjelle krem të athët, majdanoz të grirë dhe disa patatina naços me djathë.
Leave a Reply