A keni provuar ndonjëherë Pulë me petë? Besoj vetëm nëse jeni nga zona e Korçës, edhe mundet.
Sado që më pëlqen të gatuaj pjata nga të gjitha vendet e botës, kur vjen puna te gatimet tradicionale, ato me të cilat jam rritur, më kap një entuziazëm i paparë. Sigurisht që edhe pse e marr recetën nga mami gatimi im nuk del kurrë si nga dora e saj dhe kam hequr dorë të gënjej veten time apo të tjerët që ia kam dalë ta bëj si mami. Besoj se kjo u ndodh të gjithëve ndaj nuk ndihem keq ☺.
Receta e mëposhtme është një gatim tradicional korçar, por e gjen edhe në krahina të ndryshme. Megjithatë nuk quhet tamam pulë me petë pasi ndryshon teknika e gatimit. Në këtë recetë unë kam bërë vetë petat nga e para, por ju mund të përdorni dhe peta byreku gjysëm të gatshme, jo nga ato që janë në pako stërgjatëshe. Receta del shumë mirë në fakt kur petët janë të bëra në shtëpi. Ndaj nëse keni kohë dhe dini si të hapni petë ju këshilloj që ti bëni vetë. Në të kundërt ndiqni recetën tjetër këtu ku e keni edhe me video.
Pulë me petë
Përbërësit
- 🔹️ 450g miell
- 🔹️ 350-400 ml ujë të vakët
- 🔹️ pak kripë
- 🔹️ 1 pulë mesatare
- 🔹️ 100gr gjalpë
- 🔹️ 1 thelpi hudhër i shtypur
Instructions
- Përgatisim brumin e petave duke punuar me duar miellin, ujin dhe kripën deri sa brumi të bëhet elastik. Unë përdora mikser, por edhe me duar punohet fare kollaj.
- E lëmë brumin të pushojë rreth 15 minuta.
- E ndajmë brumin në 10-12 toptha të vegjël dhe i hapim ne peta sa më të holla.
- Ngrohni një tigan të sheshtë, merrni një petë dhe paloseni ne katërsh. Piqeni petën nga të dyja anët derisa të vëreni pikëza të vogla të zeza. Njëherë e një kohë petat piqeshin mbi plitkën e sobës pasi nuk ishin pianura qeramike.
- Petët e pjekura vendosini në një enë dhe mbulojini me picetë që të rrinë të buta.
- Ndërkohë pjekim pulën në furrë së bashku me 3 gota ujë, pak kripë dhe gjalpë përsipër. Pula do piqet dhe zihet njëkohësisht. Lëngu duhet të dalë diku tek rreth 3-4 gota.
- Pasi lëngu i pulës të jetë gati, tretni gjalpin në një tigan dhe fillojmë me përgatitjen e tavës.
- Hidhni pak gjalpë në tepsi dhe shtroni një petë, më të madhen që keni që të mbulojë tavën. Spërkatni pak gjalpë sipër.
- Merrni një petë tjetër dhe copëtojeni me duar në copëza mesatare. Spërkasni sipër pak gjalpë dhe hidhnipak lëng pule sipër që të njomen petat, por jo shumë pasi shtresë pas shtrese lëngu do kullojë në fund dhe petat rrezikojnë të squllen. Përsërisni këtë process deri në mbarim të gjithë petave. Sigurohuni ti trazoni me duar petat në mënyrë që të njomen njëtrajtësisht.
- Spërkatni pak gjalpë sipër bashkë me lëngun nga pjekja e pulës, vendosni copat e pulës që keni zier dhe piqeni ne 250◦C deri sa petat ta kenë pirë mirë lëngun dhe vende vende të kenë marrë ngjyrë kafe të errët si në foto.
Fjori
13 Korrik, 2017 at 9:24 amDuket shume e shijshme , flm per receten. Sapo ta kem gatuar do tju njoftoj per rezultatin! 🙂 Recetat tradicionale githmone kane vendin e tyre dhe besoj suksesin me vete :))
Bake My Day Happy
13 Korrik, 2017 at 7:27 amFaleminderit Fjori, më thuaj si do të të duket. Sigurisht që recetat tradicionale tonat kanë vendin e tyre dhe plot të tjera do vijojnë. Nuk duhet humbur tradita në asnjë mënyrë.