Unë jam me origjinë nga Korça e besoj se të gjithë biem dakort kur themi se Korçarët dinë të bëjnë turshi (sa modeste që jam apo jo ☺). Në familjen time turshitë janë bërë gjithmonë, në fillim nga gjyshja e më pas u trashëgua te mami e tezja, tani tek e unë e kështu me rradhë. Sot gjen mënyra pa fund për të bërë turshi, duke përdorur lloj-lloj përbërësish, por unë do ndaj me ju ashtu siç e bënte gjyshja ime. Kam zgjedhur të ndaj me ju 2 llojet tradicionale të turshive në shtëpinë tonë, ajo e kastravecit dhe ajo e lakrës miks. E treta është version I ri pasi tradicionalisht janë përdorur specat me gjizë dhe jo kjo që unë po ju shkruaj. Le të themi e keni bonus nga ana ime.
Turshi të bëra sipas metodës së vjetër
Notes
Turshite duan rreth 5-7 dite (gjate veres) qe te jene teresisht gati
Përbërësit
- Kastravec turshi
- • 1 kg kastravec I vogël për turshi
- • 3 lugë gjelle kripë
- Lakër turshi miks
- • 1 lakër e bardhë e prerë në rripa
- • 1 spec jeshil I grirë në kuba
- • 2 karrota të grira në rende
- • 3 lugë gjelle kripë
- • 6 thelpinj hudhër
- • 1 tufë majdanoz
- Speca qershi të mbushura
- • 10 speca qershi djegës (të qëruara nga farat)
- • 50 gr djathë dhie
- • 50 gr krem qumështi të athët (sour crème)
- • Vaj ulliri sa të nevojitet
- • 2 kupa ujë
- • 1/3 kupë uthull rrushi
- • 1 lugë gjelle sheqer
- • 1 lugë gjelle kripë kokërr madhe
- • 1 lugë çaji piper kokërr
- • 4 thelpinj hudhër
- • 3 gjethe dafine
Instructions
- PËR TURSHINË E KASTRAVECAVE:
- ndani kastravecat përgjysëm dhe futini në një shishe plastike 1.5 litërshe.
- Shtoni në të kripën dhe tundeni që të lyhen të gjitha.
- Mbyllni kapakun dhe lereni ne nje vend me dritë per 24 orë.
- Të nesërmen, shtoni ujë sa të mbulohen kastravecat dhe tundeni mirë.
- Provoni lëngun nese ka kripë mjaftueshëm (sa duhet te kete gjella psh) dhe nëse ka nevojë shtoni pak më shumë.
- Mbylleni shishen dhe lereni në një vend të ngrohtë (unë e lashë në ballkon) për 5-7 ditë.
- Tundeni shishen minimalisht 1 herë në ditë.
- Pas 5-7 ditësh do vëreni që uji është bërë I turbullt dhe me disa mbetje pak të bardha në sipërfaqe. Kjo është tërësisht normale.
- Transferojeni turshinë në një enë qelqi dhe konsumojeni sipas dëshirës.
- BONUS: Ju këshilloj që edhe lëngun e turshisë ta konsumoni pasi bën vertet mirë për tretjen përveç shijes së mirë që ka sigurisht.
- PËR TURSHINË E LAKRËS:
- bëni të njëjtin process si me kastravecin.
- Bashkoni lakrën, specin, majdanozin e grirë, hudhrat e karrotën.
- Shtoni kripën dhe përziejini mirë me dorë duke I shtypur paksa.
- Futeni në një shishe me grykë të gjerë ose një kavanoz dhe lereni për 24 orë.
- Pas 24 orësh mbusheni me ujë, rregulloni me kripë dhe lereni të fermentohet për 5-7 ditë.
- Më pas është jetësore të konsumohet me një pjatë fasule korçe e me pak bukë misri të ngrohtë ☺.
- PËR SPECAT QERSHI DJEGËS:
- Në një tenxhere hidhni ujin, uthullën, kripën, sheqerin, piperin dhe dafinën.
- Vloni ujin e më pas zhysni në të specat për 4 minuta.
- Hiqini me kujdes e lerini të thahen. Në një enë të vogël shtypni djathin me salcën e athët deri sa të bëhet një masë homogjene.
- Mbushni specat e më pas futini në një kavanoz.
- Shtoni hudhrat, dafinën dhe mbusheni kavanozin me vaj sa të mbulohen specat.
- Turshitë djegëse I keni gati pas 2 ditësh e mund të ruhen deri në 2 muaj në frigorifer
Genta I
17 Gusht, 2022 at 11:11 pmPershendetje, bera turshite sipas metodes tuaj, por u krijuan shume substanca te bardha ne lengun e turshive, Jo vetem siper por kudo. Mos me Jane prishur dhe nuk duhet ti konsumoj? Faleminderit dhe nje dite te mbare.
Bake My Day Happy
18 Gusht, 2022 at 12:11 amPërshëndetje, në turshitë e bëra me kripë ndodh shpesh që të dalin substanca të bardha, si pasojë e fermentimit. Nëse kavanozat i ke sterilizuar mirë, provoje lëngun dhe perimet. Nëse ka shije të mirë të athët e të kripur, dhe perimja është pak kërce atëhere i ke në rregull ☺️