Kesadijas me djathë dhe pulë

Tani që e zotëruat artin e të bërit Tortija me miell gruri ☺, jeni gati ti perfeksiononi aftësitë tuaja duke provuar të bëni Kesadijas.

Fjala Quesadilla (shqiptohet: Kesadija) vjen nga fjala spanjolle Queso (shqiptohet: Keso), që do të thotë djathë, kështu që fjalë për fjalë, Kesadijas jane pite tortija të mbushura me djathë. Mund ti mbushni me çfarë të dëshironi, por e rëndësishme është që të paktën 50% e mbushjes të jetë djathë. Unë biles i përgatis edhe për tua dhënë me vete në shkollë.

Sasia: 4 persona

Koha Totale: 10 minuta

Koha e përgatitjes: 7 minuta

PËRBËRËSIT:

8 pite tortija
2 kupa djathë të grirë Çedar, ose Guda, ose Emental ose çdo lloj djathi tjetër që shkrihet.
2 kupa gjoks pule zgare në copëza të vogla
3 lugë gjelle spec turshi jalapeno (halapenjo) ose zëvëndësojeni me spec jeshil, ose kastravec turshi
4 lugë gjelle salcë krem qumështi të athët (sour creme)
3 lugë gjelle erza mikse për Taco
Salcë pikantë për spërkatje
4 lugë çaji gjalpë

Fillojmë me përzierjen e mishit të pulës me erëzat mikse për Tacos dhe ngrohini paksa në një tigan për disa minuta
Shtroni një pite tortija dhe vendosni mbi të ¼ kupë djathë të grirë
Shtoni mbi të ¼ kupë të copëzave të pulës.
Shtoni specat djegës halapenjo, ose speca jeshilë, ose kastravecin turshi dhe vendosni mbi të një pite të përsipër.
Përsërisni hapat nga 1-4 edhe për pitet e mbetura.
Ngrohni një tigan që nuk ngjit në temperaturë të ulët dhe shtoni 1 lugë çaji gjalpë.
Vendosni kesadijën me kujdes dhe duke e shtypur me shpatullëz lereni të gatuhet për 2-3 minuta. Kthejeni në anën tjetër dhe gatuajeni edhe për një minutë më shumë.
Hiqeni nga zjarri dhe hidhini persipër 1 lugë gjelle salcë krem qumështi të athët. Spërkasni pakëz salcë pikante nëse ju pëlqejnë shijet e forta.
Përsërisni sa më lart edhe për 3 kesadijat e mbetura
Sherbejini sa janë ende të ngrohta