Gatimi për mua është anti-stres. Kur i futem gatimit harroj çdo gjë negative, biles herë pas here e kap veten edhe duke kënduar .
Një ndër ëmbëlsirat që ia kam marrë dorën pothuaj shkëlqyeshëm janë minikekët (cupcakes) dhe sidomos dekorimi i tyre. Rroftë ebay & amazon që kam blerë pafund xhingla dekorimi se në Tiranë është shumë e vështirë të gjesh ndonjë gjë që tia vlejë (përveç letrave të cupcakes që i gjen shumë mirë dhe lirë).
Gjithsesi, që mos të zgjatem, më poshtë po jap recetën e minikekëve që kam patur më shumë sukses në shtëpi dhe në punë. Recetën e kam përshtatur nga libri i Martha Stewart.
Sasia: 40 minikekë
Koha totale: 1 orë
PËRBËRËSIT:
Për minikekët:
- 4 1/4 kupa miell
- 1 1/2 kupa sheqer kaf
- 3 tsp sodë buke
- 1 1/2 tsp pluhur pjekje
- 1 tsp kripë
- 3/4 kupa vaj
- 3 vezë +1 të verdhë veze
- 2 kupa qumësht ku të keni shtuar 1 tsp lëng limoni
- 1 1/4 kupa ujë të vakët
- Pak vanilje
- 1/2 kupa boronicë (e freskët ose e ngrirë)
Për kremin:
- 250gr maskarpone
- 150gr gjalpë në temp ambjenti
- 1/2 kupa sheqer pluhur
- Pak vanilje
- Ngjyrues ushqimor (sipas dëshirës)
Masat per kupat dhe lugët e matjeve I gjeni këtu:
- Ngrohim furrën në 180 °. Nxjerrim tavat për minikekë dhe i veshim me letrat përkatëse.
- Në një tas të madh hedhim vezët, sheqerin, vajin, ujin, qumështin e përzier me limon dhe i trazojmë sa të bashkohen të gjitha (ky process zgjat rreth 2 min). Pastaj vendosim një sitë sipër tasit dhe hedhim miellin, sodën, pluhurin pjekës dhe i sitim sipër përzierjes së vezëve. Shtojmë kripën dhe i trazojmë sa mielli të bashkohet me lëngjet. Në fund shtojmë dhe boronicat të cilat i kemi spërkatur pak me miell dhe e trazojmë brumin me spatul silikoni që mos të dëmtohen frutat. Spërkatja me miell bën të mundur që frutat të mos zhyten në fund të brumit.
- Hedhim masën e brumit në tavë duke i mbushur deri në 3/4 të lartësisë dhe i pjekim për 30-40 min deri sa të marrin një ngjyrë kafe të çelët (Mund të shtoni edhe disa copëza të vogla çokollatash sipas dëshirës).
- Ndërkohë që kekët piqen, përgatisim kremin. Hedhim gjalpin e butë në tasin e mikserit dhe shtojmë sheqerin pluhur. I trazojmë deri sa gjalpi të marrë ngjyrë të verdhë të çelët dhe të jetë thuajse dyfishuar në volum. Shtojmë dhe maskarponen dhe i trazojmë deri sa të bashkohen mirë.
- Shtojmë ngjyrën (ose ngjyrat e preferuara nëse do përdorni më shumë se një), e hedhim kremin në qese pastiçerie dhe e lemë mënjanë.
- Pasi kekët të jenë ftohur mirë mund të vijojmë me dekorimin.
Në foto unë kam përdorur koka dekoruese me formë trëndafili gjë që e bëjnë dekorimin më të thjeshtë (për ata që kanë dëshirë ti blejnë i gjeni në ebay me emrin russian piping nozzels dhe ka pafundësi formash).
