Shpretka të mbushura me oriz dhe erëza

Që herën e parë që kam provuar shpretkat e mbushura nuk kam ndaluar së tentuari ti bëj edhe në shtëpi. Ishte dashuri me shijim të parë sigurisht. Ama nuk ka qënë e thjeshtë ta ribëje në shtëpi këtë pjatë unike, pasi shpesh herë kam dështuar. Disa herë shpretka nuk gatuhej mirë dhe dilte e fortë, herë të tjera mbushja nuk më dilte siç duhej, por kësaj rradhe them se gjeta recetën e duhur dhe ndaj vendosa ta ndaj edhe me ju. Fëmijëve nuk ua mbushi syrin, perveç tim biri I cili e provoi një kafshatë, por nuk I shijoi. Sigurisht, kush është ai fëmijë që e shijon shpretkën që me herën e parë ☺, ama ne të rriturit përpimë çdo kafshatë.

Sasia: 4 persona

Koha totale: 15 minuta + 35 minuta pjekje

PËRBËRËSIT:

2 shpretka viçi të ndara në gjysëm
2 lugë gjelle vaj ulliri
¼ kupë oriz kokërr vogël
3 qepë të njoma të prera hollë
1 tufë mente ( nenexhik/mëndërz)
1 tufë kopër
¼ lugë çaji piper i zi
1 lugë çaji kripë ose më shumë sipas dëshirës
1 ½ kupë ujë

Masat per kupat dhe lugët e matjeve I gjeni këtu:

Fusni majën e thikës me kujdes në mesin e shpretkës (aty ku e keni ndarë në gjysëm) dhe krijoni një boshllëk ku do fusni mbushjen. Mundohuni ta zgjeroni me ndihmën e gishtave në mënyrë që të mos dëmtoni shpretkën nga jashtë.
Ngrohni furrën në 250 ◦C
Hidhni vajin e ullirit në tigan dhe fërgoni qepët e njoma për gati 2 minuta.
Shtoni orizin, erëzat, piperin, kripën dhe vazhdoni ti fërgoni edhe per gati 5 minuta të tjera duke trazuar vazhdimisht.
Shtoni ½ kupë ujë dhe lereni të vlojë në temperaturë të ulët deri sa uji të jetë përthithur pothuaj plotësisht.
Me ndihmën e një luge çaji mbushni shpretkat duke lënë 1 cm bosh në mënyrë që ti mbyllni me ndihmën e një kruajtëse dhëmbësh.
Sistemojini mirë shpretkat në tavë dhe anash shtoni orizin e mbetur nga mbushja duke u kujdesur të mbushni hapësirat midis shpretkave.
Shtoni 1 kupë ujë, mbulojeni tepsinë me letër alumini dhe vendoseni në furrën e parangrohur për 35 minuta ose derisa uji të jetë përthithur plotësisht
Pas pjekjes, priteni me kujdes shpretkën dhe sistemojeni bukur në pjatën e servirjes.
Shërbejeni sa është ende e ngrohtë.