charset="UTF-8" /> Profiterol -

Profiterol

Profiterol

Profiterolët janë ëmbëlsira të ngjashme me pasta ekler, pasi kanë të njëjtën përbërje brumi. Nëse brumin e hedhim në forma me dhëmbëza, e skuqim dhe e hedhim në shërbet atëhere kemi bërë tullumba, nëse e skuqim dhe pastaj i rrotullojmë në sheqer me kanellë kemi bërë churros, nëse e pjekim bëjmë bignè apo pasta ekler.

Kjo ndodh sepse baza e brumit ose siç quhet në të vërtetë  pâte au choux (pasta shu) është e njëjtë. Unë nisa të bëja tullumba në fakt, por meqë zgjodha formën e dhëmbëzuar të vogël, tullumbat më dolën shumë të holla ndaj dhe gjatë rrugës vendosa të bëj profiterol.

Sasia: 36 profiterol (në varësi të madhësisë)

Koha totale: 40 -50 minuta dhe 30minuta ftohja e kremit.

PËRBËRËSIT:

Për binje-të (bignè)

  • 112gr ujë
  • 62gr gjalpë
  • 1/2 lugë çaji kripë
  • 122gr miell
  • 4 vezë mesatare

Për kremin:

  • 4 të verdha vezësh
  • 2 lugë gjelle rrafsh miell
  • 350ml qumësht
  • 2 lugë gjelle sheqer
  • Pak vanilje

Për  veshjen

  • 200gr çokollatë të zezë
  1. Ndezim furrën në 200°C
  2. Në një tenxhere të vogël hedhim ujin ,gjalpin, kripën dhe e lemë deri sa gjalpi të tretet. Pa valuar uji, hedhim miellin dhe me një lugë druri e trazojmë shpejt deri sa të bëhet një topth që nuk ngjit në anët e tenxheres. E vazhdojmë trazimin edhe për 2 min të tjera.
  3. E heqim brumin dhe e hedhim në një tas të madh qelqi dhe vazhdojmë trazimin në mënyrë që brumi të ftohet. Kur brumi të jetë i vakët në prekje, fillojmë të hedhim vezët një e nga një.
  4. Ky proçes duhet të bëhet me lugë druri pasi nëse e trazojmë brumin me vezët në mikser, brumi do bëhet elastik dhe nuk do  fryhet gjatë pjekjes.  Pasi veza e parë të jetë bashkuar mirë me brumin , hedhim të dytën, e kështu me rradhë derisa ti kemi hedhur gjithë vezët.
  5. E hedhim brumin në qese pastiçerie dhe i presim majën qeses (mund të përdorni dhe kokë dekoruese pa dhëmbëza) dhe me të bëjmë bignè-të në tepsi (të veshur me letër pjekje) duke lënë distancë rreth 3 cm nga njëra tjetra.
  6. I pjekim në furrë për gati 30 -35 min ose  deri sa të marrin ngjyrë si në foto       
  7. Ndërkohë që bignè-të piqen, vijojmë me kremin. Vemë në zjarr qumështin , vaniljen dhe sheqerin që të ngrohen, ndërkohë rrahim me tel të verdhat e vezëve me miellin.
  8. Sapo qumështi të jetë ngrohur ia hedhim me kujdes vezëve duke i rrahur vazhdimisht në mënyrë që mos piqen vezët. E rikthejmë përzierjen në tenxhere , e vendosim në zjarr të ulët dhe vazhdojmë ta trazojmë deri sa kremi të trashet (7 min afërsisht).
  9. E transferojmë kremin në një tas qelqi dhe e mbulojmë me qese trasparente e cila takon mbi krem në mënyrë që mos të na zerë cipë.(Nëse gjatë gatimit kremi ka kokrriza kalojeni në sitë dhe çdo copëz e trashë do mbetet aty).
  10. Pasi kemi përfunduar kremin, kontrollojmë bignè-të nëse janë pjekur dhe vazhdojmë pjekim të tjerat (nëse ju ka mbetur ende brumë)
  11. Pasi kremi dhe të tëra bignè-të të jenë ftohur fillojmë me procesin e bërjes së profiterolëve. Copëtojmë çokollatën e zezë dhe e shkrijmë në banjë mari     
  12. Me ndihmën e një bishti luge, bëjmë një vrimë të vogël në bazën e poshtme të bignè-së dhe me një qese pastiçerie të cilin e kemi mbushur paraprakisht me kremin e ftohur e mbushim mirë (ndihet në dorë kur bignè-ja është mbushur)
  13. E kapim mirë profiterolin në bazë dhe zhysim pjesën e sipërme në çokollatë. E ripërsërisim proçesin deri sa të tërë guackat boshe të jenë mbushur të gjitha. (Kaq e shkëlqyeshme është veshja me çokollatë sa nëse shikoni me kujdes mund të më gjeni dhe mua të reflektuar duke i bërë foto 😂)
  14. I vemë në frigorifer deri sa çokollata të jetë forcuar.

 

PS: nuk po shkruaj se sa mund të durojnë profiterolët pasi jam e sigurtë që brenda 1 ore do i keni ngrënë të gjitha